ओठ माझे चुंबिण्या ओठांवरी आली गझल

ओठ माझे चुंबिण्या ओठांवरी आली गझल :

संगीत : गायक : प्रा. हर्षवर्धन मानकर 

.

ओठ माझे चुंबिण्या ओठांवरी आली गझल;
हात माझा घेत हाती प्रेयसी झाली गझल.

त्या खळीच्या भोव-याने जीव माझा घेतला;
बोलताना मोकळे ती हासली गाली गझल.

तू लिही नशिबात माझ्या संकटांची शृंखला;
फक्त त्यांच्या सोबतीने तू लिही भाली गझल.

हिंडतो का जागजागी तू अनाथासारखा;
भंगलेल्या माणसांची ही खरी वाली गझल.

जन्म माझा झिंगण्याची दोन होती कारणे;
एक प्याला अंगुराचा, एक ही साली गझल.

पोचलो स्वर्गात मी पण खंत आहे अंतरी;
एक माझ्या आवडीची राहिली खाली गझल